Monday, June 12, 2006

我們都被騙了?(2046後記)


本來怨男怨女全片兩小時重頭到尾義無反顧怨!怨!怨!都看得我有點「興恰恰」:「唔係掛,又落街買魚旦粉」;「吓,山長水遠對住個窿講心事咁衣柜,向關X鵬看齊?」但諗深一層,花樣年華其實「唔打得都睇得」;衫靚美指靚攝影靚歌靚音樂靚甚至人靚(好似冇樣關王家衛事),都算賞心悅目啦。

咁2046呢?追隨王家衛多年的眾迷哥迷姐,等等等由廿世紀末等到廿一世紀初,連「北京之夏(唔知又等幾耐)」及「華樣年華」都拍埋,等到的可算是一個偏局 - 雷聲太大,雨?毛都冇滴!2046年未來都市景(我地估姐,人地只係講2046係部列車嘅編號。)?原來只係幾幕好求其既3D Rendering。最最最失望的是戲中主線只係舊瓶舊酒:解開「亞飛」中尾場朝偉身世之謎;所謂「花樣年華」的延續;麗珍的「陰魂不散」等不能盡錄。王太小看觀眾的觀賞能力。我邊看邊想像王家衛/張叔平對住一堆冇頭冇尾既零星鏡頭頭都大,好吃力地剪成一個故事(因為好多旁白,好多字幕板)。八成無頭無尾嘅片段都好沉溺好浮面好怨(又係怨),好多仲要係喊戲,唔通一定要喊先叫有戲味?。其實除了章子怡差D外眾姐仔都已經交足戲,但她們的過去及感受唔係真係要對住個窿先講得掛(鏡頭面前?Noway!唔係咩叫秘密!哼!),換言之「我喊死都唔講!」(可能因為冇劇本,點講?)。可想而知其怨氣何止比「花」多三倍,論主角數量都唔止啦!

就以上種種對2046的批評有理由相信是「冇劇本導演手法」的後果。「識」王家衛咁耐都知他的作品未到剪片都唔知古仔點講,所以講古佬旁白例牌發揮作用,打死都唔信現在2046嘅母題(由「花」片2046房間引發)係早有安排,因2046的開拍日期比「花」早。諗得衰D,當初提出2046的慨念時煲得太大,現在收唔到科。

唔好彩睇到以上文章的人兄人姐一定以為筆者對王氏嘅作品一向都吾過電,但其實我都曾經都愛過它,它是﹣春光乍洩。

No comments: